На сьвяткаваньне Дня Перамогі ў Маскву сёлета, як чакаецца, не прыедзе ніводзін замежны лідэр. Пра гэта паведаміў РІА Новости прэс-сакратар Крамля Дзьмітрый Пяскоў. Ён дадаў, што адмысловыя запрашэньні кіраўнікам дзяржаваў наведаць Маскву 9 траўня і ня рассылаліся.
У папярэднія гады Пяскоў прыкладна такімі ж словамі адказваў на пытаньні пра прыезд замежных лідараў у Расею на Дзень Перамогі. Ён абгрунтоўваў гэта тым, што гаворка ня йдзе пра юбілейныя гады. Аднак у 2017 годзе на парадзе 9 траўня ў Маскве ўсё ж прысутнічаў прэзыдэнт Малдовы Ігар Дадон, а 9 траўня 2018 году ў расейскую сталіцу прыехалі прэм’ер-міністар Ізраілю Біньямін Нэтаньягу і прэзыдэнт Сэрбіі Аляксандар Вучыч. Яны разам з Уладзімірам Пуціным узялі ўдзел і ў акцыі «Несьмяротны полк».
Аляксандар Лукашэнка летась скарыстаўся сьвяткаваньнем 9 траўня ў Менску, каб выказаць абурэньне «гандлёвымі» войнамі з Расеяй.
«Калі Расея вырашыць пайсьці далей, мы гатовыя паглыбляць наша супрацоўніцтва, Мы за каапэрацыю ў эканоміцы, адзіны рынак, за тое, каб у нас не было гэтых дурных рознагалосьсяў — малочных, мясных, цукровых войнаў і іншага. Гэта проста сарамоцьце», — заявіў ён пасьля ўскладаньня кветак на менскай плошчы Перамогі 9 траўня 2018.
