Блогер з Акцябрскага расчараваўся ў партыі пасьля таго, як не дачакаўся падтрымкі, калі ў яго рабілі ператрус.
Фатограф і блогер з пасёлку Акцябрскі Андрэй Павук апублікаваў на Facebook зварот да старшыні Аб’яднанай грамадзянскай партыі з просьбай выключыць яго з АГП. Ён растлумачыў Свабодзе, што разглядае варыянты далучэньня да іншых партыяў, але пакуль ня вырашыў, ці пойдзе ў нейкую канкрэтную.
«Кажу шчыра: АГП, на жаль, гэта ня тая партыя, якая яднае людзей, — разважае Павук. — Калі ў мяне былі праблемы, адзін [былы старшыня АГП] Лябедзька мне напісаў, „як ты, жыў-здароў?“. Астатнія — маўчаньне.
Гэта партыя дзеля партыі. А калі ўсё роўна, партыец ці не партыец, калі розьніцы няма, дык навошта?»
Гісторыя, прва якую гаворыць Павук — ператрус і затрыманьне 20 сакавіка ў сувязі з крымінальнай справай аб фальшывым мінаваньні будынку райвыканкаму (блогер мяркуе, гэта была падстава забраць тэхніку і спроба знайсьці зачэпкі для перасьледу).
Ён дадае, што з АГП раней было «багата скандалаў», сышлі «цікавыя людзі», як то Зьміцер Кавалгін. Павук робіць выснову: «Клімат і атмасфэра не спрыяюць таму, каб плённа працавалі».
Палітычную дзейнасьць, кажа Павук, ён не зьбіраецца пакідаць. Калі пабачыць, што мае зь нейкай партыяй агульныя інтарэсы, а партыі будзе патрэбна ягоная дапамога, ён далучыцца. Але дадае:
«Самаарганізацыя — наша ўсё, мо і ня трэба ніякіх партыяў».
АГП: Павуку дапамагалі
Прэс-сакратарка АГП Ганна Красуліна растлумачыла Свабодзе, што паведамленьня аб выхадзе з партыі, згодна статуту, дастаткова — партыя прымае гэта.
Але калі было затрыманьне і ператрус, адзначае Красуліна, партыя апублікавала інфармацыю пра гэта, у дзень затрыманьня на сайце АГП зьявіўся камэнтар лідэра партыі Мікалая Казлова.
Юрыдычную дапамогу Павуку, дадае Красуліна, аказваў і аказвае сябра партыі — чалец Нацыянальнага камітэту і старшыня камісіі АГП па прававых пытаньнях і правах чалавека, праваабаронца Леанід Судаленка. Ён быў на сувязі, кансультаваў Андрэя і ягоную жонку па тэлефоне амаль кожную гадзіну і меў выехаць у пасёлак адразу, калі будзе такая неабходнасьць.
«На гэты момант складзеная і адпраўленая скарга ў пракуратуру вобласьці, чакаем адказу, — растлумачыў сам Судаленка. — Усю юрыдычную дапамогу ён атрымлівае».
Красуліна адзначае, што бачыць у сацыяльных сетках, што Андрэй Павук і ягоная жонка Вольга «апошнім часам бяруць удзел у справах „Гавары праўду“». Гэта дапушчальна: фармальна „Гавары праўду“ ня партыя, а АГП не забараняе чальцам браць удзел у грамадзкіх арганізацыях, дадае Красуліна, але на самой справе «Гавары праўду» відавочна перасьледуе палітычныя мэты. А калі дзьве арганізацыі маюць палітычныя мэты, можа аказацца, што іхныя інтарэсы перасякаюцца.
«Я ня думаю, што нешта страшнае адбылося, — разважае Красуліна. — Нічога скандальнага ў гэтым няма. Гэта нармальны працэс, калі чалавек вызначаецца, у той ён арганізацыі ці ў гэтай. Тым больш, што ўжо пачынаецца актыўны перыяд навучаньня кандыдатаў да парлямэнцкай кампаніі, так што ў любым выпадку кандыдатам трэба вызначацца, ад каго яны будуць ісьці».
Хто такі Андрэй Павук
Андрэй Павук цяпер вядомы ў сувязі з крэатыўнымі акцыямі й пэрформансамі ў ягоным родным пасёлку Акцябарскім (мястэчку Рудобелцы), спрэчкамі зь мясцовымі ўладамі. Яго і раней перасьледавалі за актывізм, у тым ліку судзілі з загадзя напісаным выракам. Таксама блогер вядзе YouTube-канал «Рудабельская паказуха», на які падпісана больш за 8 тысяч чалавек.
Упершыню ж ягонае імя стала вядомае шырокай публіцы празь песьню «Я из деревни» — кліп здымалі для конкурсу БРСМ, у выніку ён стаў інтэрнэт-мэмам.
