Каб забясьпечыць беларусаў чыстай вадой, трэба пабудаваць 1400 ачышчальных станцый.
Такую лічбу назвала Марына Тоўсьцік, начальніца ўпраўленьня камунальнай гаспадаркі і энэргетыкі Міністэрства жыльлёва-камунальнай гаспадаркі Беларусі.
Паводле яе, найбольшая праблема зь якасьцю вады ў Беларусі зьвязаная зь лішкам жалеза. Таму, каб цалкам справіцца з праблемай, патрэбна пабудаваць 1400 станцый абезжалезваньня. Завяршыць гэтую працу плянуецца к 2025 году. Летась было пабудавана 40 станцый, на 2019 год плянуецца пабудаваць 250.
Прычым будаўніцтва вядзецца ня толькі за кошт беларускага бюджэту, але і з дапамогай Эўрапейскага банку рэканструкцыі і разьвіцьця. Гэты банк ужо выдзеліў 15 мільёнаў эўра на будаўніцтва 80 станцый у Віцебскай вобласьці. Зь бюджэту на 2019–2020 гады на будаўніцтва станцый будзе выдзелена больш за 120 мільёнаў рублёў.
Паводле Марыны Тоўсьцік, на сёньня чыстай вадой у Беларусі забясьпечана 90,5% насельніцтва.
