Амбасадар Беларусі ў Расеі Уладзімер Сямашка заявіў у інтэрвію ТАСС, што выхад на рашэньні аб паглыбленьні эканамічнай інтэграцыі Расеі і Беларусі можа заняць «магчыма, 1,5-2 гады».
Паводле Сямашкі, Расея і Беларусь павінны ў бліжэйшыя гады працаваць адразу па некалькіх кірунках, адзін з асноўных – супрацоўніцтва ў рамках «саюзнай дзяржавы».
Паводле амбасадара, ёсьць пэўныя праблемы ў эканамічнай і сацыяльнай сфэрах. Створаная група пад сустаршыньствам міністра эканомікі Беларусі Дзьмітрыя Крутога і міністра эканамічнага разьвіцьця Расеі Максіма Арэшкіна зробіць «аналіз выкананьня дамовы, выпрацуе прапановы аб далейшым разьвіцьці беларуска-расейскай інтэграцыі».
«Трэба думаць пра плюсы і мінусы ўвядзеньня адзінай валюты, адзінага эмісійнага цэнтра, адзінага падатковага кодэксу. Але гэта ўсё складаныя пытаньні», – заявіў Сямашка.
Што тычыцца ўніфікацыі падаткаабкладаньня, то паводле амбасадара, «трэба браць пад увагу, што ў нас розная структура напаўняльнасьці бюджэтаў».
«У Расеі пераважае нафта і газ, у нас – вытворчасьць, БелАЗ, МАЗ, МТЗ», – сказаў ён.
Таксама Уладзімер Сямашка сказаў, што Масква і Менск урэгулююць рознагалосьсі ў нафтагазавай сфэры.
«Я ня думаю, што ёсьць пагаршэньне ў стасунках»
«Я ня думаю, што ёсьць пагаршэньне ў стасунках, асобныя расейскія СМІ гіпэртрафавалі вядомыя разыходжаньні ў падыходах дзьвюх краін», – сказаў амбасадар.
Сямашка назваў прыярытэтам сваёй працы ў Маскве выпраўленьне «рэзка адмоўнага» балянсу зьнешняга гандлю паміж дзьвюма краінамі.
«У нас зьнешнія даўгі складаюць каля 40% ВУП. Гэта яшчэ не небясьпечны ўзровень, але блізка да гэтага, у асноўным, за кошт таго, што мы маем адмоўнае гандлёвае сальда з Расеяй», – сказаў Сямашка.
Адмоўнае сальда вырасла на 3,5 мільярда даляраў
За першыя 10 месяцаў 2018 года адмоўнае сальда параўнальна з першымі 10 месяцамі 2017 года вырасла на 3,5 мільярда даляраў. Гэта адбылося з-за таго, што нафта і нафтапрадукты істотна падаражэлі.
«У выпадку рэалізацыі ў поўным аб'ёме падатковага манэўру мы вымушаны будзем пераплачваць яшчэ 3 мільярды даляраў штогод», – сказаў Уладзімер Сямашка.
Беларускі бок спадзяецца, што да моманту стварэньня адзінага рынку энэрганосьбітаў у 2025 годзе цана на газ будзе «блізкай да расейскай».
Пастаўкі мяса-малочнай прадукцыі зьменшыліся на 650 мільёнаў даляраў
Сямашка таксама наракаў на дыскрымінацыю адносна беларускага тавару на расейскім рынку.
«Гэта ж не справа, калі расейскі Рассельгаснагляд уводзіць санкцыі, у выніку чаго зьменшыліся пастаўкі нашай мяса-малочнай прадукцыі на 650 мільёнаў даляраў, ёсьць пытаньні і з пастаўкай тэхнікі», – сказаў Сямашка.
Былы віцэ-прэм’ер Беларусі Уладзімер Сямашка быў прызначаны амбасадарам у лістападзе 2018 года
