23 лістапада кіраўнік краіны Аляксандар Лукашэнка правёў вялікую нараду пад назвай «Рэспубліканскі сэмінар аб падвышэньні эфэктыўнасьці будаўнічага комплексу Беларусі». На ёй кіраўнік краіны расказаў пра выкрытую нядаўна карупцыйную схему, якая ў выніку каштавала пасады Андрэю Шорцу.
«54 ці 56 пасьпелі прадаць кватэр. А дзе старшыня гарвыканкаму? Па-мойму, у Цэнтральным раёне гэта было. А дзе кіраўнікі гэтага раёну? Учора мною было прынятае рашэньне: усіх да адзінага ў сьледчы ізалятар, надзець кайданкі, разабрацца з усімі і вярнуць грошы народу», — заявіў кіраўнік краіны.
Старшыня гарвыканкаму Андрэй Шорац страціў сваю пасаду ўжо на наступны дзень пасьля нарады. Новым кіраўніком Менску стаў Анатоль Сівак, які раней займаў пасаду міністра транспарту і камунікацый. Паводле паведамленьняў дзяржаўных СМІ, Андрэй Шорац «будзе пераведзены на іншае месца працы». Якое менавіта, пакуль невядома.
«Ніякіх зьменаў у нас не адбылося»
З кіраўніцтвам Цэнтральнага раёну Менску, якое, па словах кіраўніка краіны, можа быць датычнае да карупцыйных схемаў, усё складаней. У прыёмнай адміністрацыі пытаньню Свабоды пра лёс кіраўніцтва раёну не зьдзівіліся і пракамэнтавалі сытуацыю не без эмоцый.
«Усё тое, пра што гаварыў кіраўнік краіны, тычылася мінулага году. Гэта ўсё здарылася яшчэ летась! — сказала сакратарка. — Вы хочаце, каб былі нейкія камэнтары да словаў кіраўніка краіны, ці што? Калі вы сочыце за падзеямі, якія адбываюцца, вы ведаеце, што зьмяніўся мэр (старшыня Менгарвыканкаму. — РС), на гэтым усё. Ніякіх зьменаў у кіраўніцтве адміністрацыі не адбылося».
Па словах супрацоўніцы адміністрацыі Цэнтральнага раёну сталіцы, яе кіраўнік Дзьмітры Пятруша знаходзіцца на працоўным месцы і выконвае свае абавязкі ў звычайным рэжыме. Гэтаксама як і яго намесьнікі.
54 кватэры
Якую ж карупцыйную гісторыю мог мець на ўвазе кіраўнік краіны?
Верагодна, гэта можа быць сытуацыя з распродажам танных кватэр у доме па вуліцы Выгоцкага ў Навінках. Амаль год таму Ўпраўленьне капітальнага будаўніцтва Цэнтральнага раёну Менску зладзіла распродаж адна- і двухпакаёвых кватэр у двух дамах, якія зьбіралася там будаваць. Цэны на іх выклікалі сапраўдны ажыятаж. Каб набыць кватэры па 27–35 тысяч даляраў (610–630 даляраў за «квадрат»), людзі выстойвалі ў чэргах на марозе аж па тры тыдні, там жа і начавалі.
Не абышлося без скандалаў. Асабліва настойлівым удалося набыць адразу па некалькі кватэр, правіламі гэта не забаранялася. Агулам па нізкім кошце УКС Цэнтральнага раёну прадаў 54 кватэры (39 у адным доме і 15 у другім, акурат столькі, колькі назваў Лукашэнка). Усім ахвочым таннага жыльля не хапіла. Аднак пра выкрыцьцё карупцыйнай схемы падчас продажу гэтага жыльля афіцыйна не паведамлялася.
А вось кіраўніцтва Цэнтральнага раёну Менску неўзабаве і праўда зьмянілася. Ігар Бузоўскі, які ўзначальваў раённую адміністрацыю падчас гісторыі з распродажам кватэр у дамах на вуліцы Выгоцкага, страціў гэтую пасаду 26 чэрвеня 2018 году. Але трапіў зусім не ў СІЗА з кайданкамі. Новым месцам працы спадара Бузоўскага стала Міністэрства інфармацыі, яго прызначылі намесьнікам міністра. Указ аб прызначэньні падпісаў асабіста Лукашэнка.
