Суд прызнаў жыхара пасёлку Ветрына Полацкага раёну Зьмітра Русака вінаватым паводле артыкулаў 368 (публічная абраза прэзыдэнта) і 340 (фальшывае паведамленьне аб падрыхтоўцы выбуху) Крымінальнага кодэксу Беларусі.
Судзьдзя Віталь Лапко пакараў Зьмітра Русака абмежаваньнем волі на два гады без накіраваньня ў папраўчую ўстанову (так званая «хатняя хімія») і з канфіскацыяй тэлефона як сродку зьдзяйсьненьня злачынства.
Прадметам судовага разбору сталі падзеі 1 траўня, калі 36-гадовы Зьміцер Русак разьмясьціў на сваёй старонцы «Ўкантакце» заведама фальшывае паведамленьне пра бомбу, нібыта закладзеную ў гандлёвым цэнтры «Манеж» у Полацку, а таксама фразу «Я ненавижу Лукашанко» i нецэнзурнае слова на адрас носьбіта гэтага прозьвішча.
У судзе Русак патлумачыў, што ў той дзень яны ў кампаніі з грамадзянамі Расеі адзначалі Міжнародны дзень cалідарнасьці працоўных, і ў яго зьявілася ідэя праверыць пільнасьць беларускіх міліцыянтаў. Ён паспрачаўся са сваімі прыяцелямі, што сілавыя структуры не адрэагуюць на ягонае паведамленьне. У міліцыю патэлефанавала жанчына, якая ўбачыла допіс пра пагрозу выбуху.
Абвінавачаньне ў абразе прэзыдэнта жыхару Полаччыны выставілі толькі праз 4 месяцы, у жніўні гэтага году. Суд прыйшоў да высновы, што абраза прэзыдэнта мела месца, хоць нецэнзурнае слова, ужытае Русаком, адносілася не да «Лукашэнкі», а да «Лукашанкі». Лінгвістычная экспэртыза таксама не давяла, што допіс тычыцца прэзыдэнта Беларусі.
Тым ня менш суд пастанавіў пакараць Зьмітра Русака за абодва злачынствы, падтрымаўшы прапанову пракурора Ігара Галаўкова, — абмежаваньнем волі на два гады без накіраваньня ў папраўчую ўстанову.
