У сацсетках зьявілася відэа, як міліцыя затрымлівае маладога чалавека, які павязаў шалік на помнік гарадавому. «Хацеў сагрэць скульптуру і сфатаграфавацца», — патлумачыў маладзён міліцыянтам, якія забралі ў яго пашпарт і запатрабавалі праехаць зь імі. Аргумэнт: «Вы павесілі шалік на скульптуру, якая ахоўваецца», «Нельга на яго нічога вешаць, таму што гэта помнік».
Пазьней затрыманы Зьміцер Завадскі расказаў, што адбылося ў пастарунку: «Завялі ў аддзяленьне, перапісалі зьвесткі і правялі кароткую тлумачальны гутарку, што «гэтая скульптура, груба кажучы, зьяўляецца тварам МУС» і што «у наступны раз на помнік вешаць нічога ня трэба».
Нядаўна міліцыянты прымусілі іншага маладога чалавека на камэру выбачыцца перад помнікам за аплявуху і разьмясьцілі відэа ў інтэрнэце.
Пасьля гэтага на Petitions.by пачаўся збор подпісаў за знос менскага помніка гарадавому, а ў беларускім сэгмэнце сацсетак пачаўся флэшмоб, дзе беларусы просяць прабачэньня ў помнікаў. Шмат выбачэньняў публікуюць пад хэштэгам #памятникпрости.
