Міжнародны прафсаюз IndustriALL асудзіў рашэньне Менскага гарадзкога суду па «справе прафсаюзаў». 9 лістапада гэтая судовая інстанцыя пакінула бязь зьменаў рашэньне суду Савецкага раёну сталіцы, які вынес вырак лідэрам незалежнага беларускага прафсаюзу работнікаў Радыёэлектроннай прамысловасьці (РЭП) Генадзю Фядынічу і Ігару Комліку ў выглядзе чатырох гадоў «хатняй хіміі».
Намесьнік генэральнага сакратара IndustriALL Кемаль Азкан, які сёлета прыяжджаў у Менск, заявіў пра міжнародную салідарнасьць з РЭПам.
«Рашэньне Менскага гарадзкога суду, які адхіліў апэляцыю і пакінуў безь зьмяненьняў несправядлівы прысуд, — гэта страчаная магчымасьць беларускіх уладаў даказаць, што ў краіне існуе справядлівасьць, і аднавіць кантакты зь міжнароднай супольнасьцю. Вялікія штрафы і забарона займаць кіроўныя пасады для абодвух лідэраў азначаюць толькі адно — намер уладаў падарваць дзейнасьць прафсаюзу РЭП, нашай сяброўскай арганізацыі ў Беларусі», — заявіў намесьнік генэральнага сакратара IndustriALL.
Кемаль Азкан таксама пацьвердзіў ранейшую заяву IndustriALL, што гэты міжнародны прафсаюз лічыць Генадзя Фядыніча і Ігара Комліка палітычнымі вязьнямі.
«Мы будзем рабіць усё магчымае, каб вызваліць іх і аказаць ціск на ўрад Беларусі, каб пакласьці канец парушэньням правоў працоўных і правоў чалавека. Мы будзем рабіць гэта да таго часу, пакуль справядлівасьць не пераможа».
Міжнародны прафсаюз IndustriALL налічвае ў 140 краінах больш за 50 мільёнаў чальцоў, якія працуюць у горназдабыўной, энэргетычнай і апрацоўчай прамысловасьці. Зьяўляецца партнэрам незалежнага беларускага прафсаюзу работнікаў Радыёэлектроннай прамысловасьці (РЭП).
«Справа РЭП». Што важна ведаць
- Генадзя Фядыніча і Ігара Комліка затрымалі 2 жніўня 2017 году. Комлік заставаўся пад вартай да пачатку кастрычніка 2017 году. Паводле сьледзтва, на літоўскі рахунак Фядыніча і Комліка ў 2011 годзе паступіла больш за 140 тысяч эўра, якія не праходзілі ў фінансавых справаздачах.
- Прафсаюзных актывістаў абвінавацілі ва ўхіленьні ад выплаты падаткаў на 23 тысячы рублёў.
- У межах справы сьледчыя апыталі больш за 800 актывістаў прафсаюзу РЭП па ўсёй краіне.
- 24 жніўня лідэраў незалежнага прафсаюзу РЭП Фядыніча і Комліка асудзілі на 4 гады «хатняй хіміі».
- Фігуранты справы называюць яе «цалкам сфабрыкаванай».
- Праваабаронцы, якія сачылі за судовым працэсам, адзначалі, што многія доказы здабытыя ў межах «таямнічых працэдураў».
- З заявамі пра неабходнасьць адмены абвінаваўчага прысуду Фядынічу і Комліку выступаюць беларускія праваабарончыя і міжнародныя арганізацыі. Так, на думку міжнароднай праваабарончай арганізацыі Front Line Defenders, перасьлед прафсаюзных лідэраў зьвязаны выключна зь іхнай мірнай і законнай працай у галіне абароны правоў чалавека.
- З патрабаваньнем адмяніць пакараньне лідэрам РЭП зьвярнуліся да прэзыдэнта Беларусі Глябальны саюз IndustriALL і Міжнародная канфэдэрацыя прафсаюзаў.
Што такое прафсаюз РЭП і чаму яго перасьледуюць
