Лібэральна-дэмакратычная партыя Беларусі пачала падрыхтоўку да дзьвюх выбарчых кампаній — прэзыдэнцкай і парлямэнцкай. Пра гэта паведаміў першы намесьнік старшыні партыі Алег Гайдукевіч. Ён сказаў, што дагэтуль ніхто ня ведае, якія выбары ў краіне адбудуцца спачатку, таму партыя вырашыла стартаваць адначасова.
«Хачу балятавацца ў прэзыдэнты»
Алег Гайдукевіч, які зьяўляецца сынам старшыні партыі Сяргея Гайдукевіча, сказаў, што хоча балятавацца ў прэзыдэнты.
«Я гатовы і буду прасіць партыю вылучыць кандыдатам у прэзыдэнты менавіта мяне. У нас адбыўся апошні зьезд партыі, які рэкамэндаваў вылучыць кандыдатам у прэзыдэнты Алега Гайдукевіча. Але канчатковае рашэньне будзе прынятае на наступным зьезьдзе, які мы плянуем правесьці ў чэрвені альбо ліпені 2019 году».
Пры гэтым Алег Гайдукевіч сказаў, што ёсьць адзін момант, які яго крыху бянтэжыць: ён не зьяўляецца старшынём партыі, а хацелася б, каб балятаваўся ў прэзыдэнты менавіта старшыня. Таму, як лічыць Алег Гайдукевіч, на зьезьдзе будзе абноўленае кіраўніцтва партыі.
Паводле Гайдукевіча, галоўнай тэзай яго прэзыдэнцкай кампаніі будзе незалежнасьць і сувэрэнітэт Беларусі.
«Больш за 90% беларусаў хочуць жыць у незалежнай краіне, таму ўсялякія размовы, што наша Беларусь кудысьці ўвойдзе, трэба заканчваць. Мы мусім захаваць сувэрэнітэт Рэспублікі Беларусь, для нас гэта галоўнае».
«Сямігадовы тэрмін пры ўмове зьмяшанай сыстэмы»
Што тычыцца самой партыі, то Алег Гайдукевіч лічыць: ЛДПБ — сыстэмная патрыятычная, канструктыўная і апазыцыйная палітычная сіла. І ўдакладніў сытуацыю з ініцыятывай павялічыць прэзыдэнцкі тэрмін да 7 гадоў замест 5, а парлямэнцкі — да 5 замест 4.
«Такая ініцыятыва была, мы яе па-ранейшаму падтрымліваем. Але чамусьці шмат хто, гаворачы пра гэта, забываецца яшчэ адну вельмі важную дэталь: мы гатовыя ініцыяваць і працягваць сваю прапанову толькі ў тым выпадку, калі наступныя парлямэнцкія выбары ў Беларусі пройдуць па зьмяшанай сыстэме. То бок палова дэпутатаў будзе выбірацца па аднамандатных акругах, а палова па партыйных сьпісах. Калі партыйных сьпісаў ня будзе, тады мы і ня будзем згадваць пра тую ініцыятыву».
«Безумоўна, важна, хто будзе ўдзельнічаць у прэзыдэнцкіх выбарах, — сказаў Алег Гайдукевіч. — У 2015 годзе ніхто з апазыцыі не сабраў 100 тысяч подпісаў. А цяпер будзе яшчэ горш з подпісамі, спадзявацца, як гэта было раней — што ўлады заплюшчаць вочы на сапраўднасьць подпісаў — ня вельмі правільна. На мой погляд, найлепшым кандыдатам ад апазыцыі была б Ганна Канапацкая. Яна ж стала дэпутатам! Дык вылучайце яе кандыдатам у прэзыдэнты. А то Правацэнтрысцкая кааліцыя шукае кандыдата — навошта яго шукаць, калі ён ужо ёсьць?»
Таксама Алег Гайдукевіч лічыць, што альтэрнатывай Канапацкай магла б стаць Алена Анісім. «Я ня ведаю, ці хоча яна балятавацца ў прэзыдэнты, але разглядаць гэтую фігуру таксама неабходна», — адзначыў ён.
