Галоўны рэдактар газэты «Советская Белоруссия» Дзьмітры Жук заявіў у камэнтары Свабодзе, што ў справе з затрыманьнямі супрацоўнікаў БелаПАН, Tut.by ды іншых выданьняў ён ня бачыць ніякага перасьледу журналістаў.
«Я ня бачу ніякага перасьледу журналістаў. Пакуль тое, што я бачу з афіцыйных крыніц, гэта справа пра крадзеж інфармацыі, пра несанкцыянаваны доступ. Усё, кропка, камэнтары скончаны», — сказаў Дзьмітры Жук.
Ці сапраўды праблемы з доступам да платных акаўнтаў БелТА ўзьніклі ў газэты «Советская Белоруссия», з чаго і пачалася ўся «справа БеЛТА», як паведаміла «Еўрарадыё» са спасылкай на ўласныя крыніцы?
Намесьнік галоўнага рэдактара газэты Сяргей Гардзіенка на гэта пытаньне адказаў нам: «Цяпер наконт гэтага мы нічога не камэнтуем».
Затрыманьні незалежных журналістаў. Што важна ведаць
- Сьледчы камітэт завёў крымінальную справу за несанкцыянаваны доступ да кампутарнай інфармацыі. Максымальнае пакараньне паводле ч. 2 арт. 349 — абмежаваньне ці пазбаўленьне волі на тэрмін да 2 гадоў.
- 7–8 жніўня прайшлі ператрусы ў офісах Tut.by, БелаПАН, Realt.by, газэты «Культура» і ТАА «Айціві». Таксама па справе праходзіць выдавецкі дом «Беларуская навука».
- Вядома, што цягам 7–9 жніўня затрымалі 17 журналістаў. Іх вызвалялі пасьля допыту ў СК.
- 9 жніўня СК заявіў, што галоўная рэдактарка Tut.by Марына Золатава прызнала віну.
- Падставай для завядзеньня крымінальнай справы паслужыла паведамленьне БелТА пра збоі ў кліентаў пры доступе да платнай падпіскі на паслугі.
- Платная падпіска БелТА каштуе 612 рублёў на месяц.
- Хто асудзіў затрыманьні журналістаў і ператрусы ў рэдакцыях. Сьпіс
- У чэрвені 2018 году супраць кіраўніка БелаПАН Алеся Ліпая завялі крымінальную справу за ўхіленьне ад сплаты падаходнага падатку.
