Пагрозы жыцьцю пацярпелым у выніку ДТЗ у Мікалаеўскай вобласьці Ўкраіны беларусам няма, такая інфармацыя ў нядзелю прагучала ў эфіры тэлеканалу «Беларусь 1».
«Напярэдадні дзевяць пацярпелых дастаўленыя ў Гомель. У абласным шпіталі яны прайшлі поўнае абсьледаваньне. Шасьцярых адпусьцілі дадому, астатнія пакуль у стацыянары. Двое знаходзяцца ў траўматалёгіі, адзін — у нэйрахірургіі», — распавяла намесьніца галоўнага лекара Крываазёрскага шпіталю Любоў Скрыпчанка.
Паводле яе, у пацярпелых чэрапна-мазгавыя траўмы, множныя ўдары і пераломы ключыцы. Стан іх стабілізавана: пагрозы жыцьцю няма.
Раніцай 20 ліпеня на адэскай трасе каля мястэчка Крывое Возера беларускі мікрааўтобус, які перавозіў беларускіх турыстаў з Адэсы ў Гомель, урэзаўся ў грузавік, што стаяў на ўзбочыне. Кіроўца мікрааўтобуса і чацьвёра пасажыраў загінулі. 12 атрымалі розныя траўмы. Кіроўцу грузавіка затрымала паліцыя.
У Гомель перавезьлі 9 з 12 беларусаў, пацярпелых у ДТЗ ва Ўкраіне
