Прэзыдэнт ЗША Дональд Трамп падпісаў «Акт аб супрацьдзеяньні супраціўнікам Амэрыкі пры дапамозе санкцыяў». Ён уносіць зьмены ў санкцыі супраць Ірану, Паўночнай Карэі і Расеі.
У суправаджальнай заяве Трамп раскрытыкаваў закон і адзначыў, што падпісвае яго «ў мэтах нацыянальнага адзінства».
Што цяпер зьменіцца для Расеі?
Прэзыдэнт ЗША ня зможа наўпрост адмяняць санкцыі
Прэзыдэнт ЗША цяпер ня зможа адмяніць санкцыі — якія раней ўводзіліся асобнымі ўказамі экс-прэзыдэнта Барака Абамы — аднаасобным рашэньнем, а павінен будзе прасіць адабрэньня Кангрэсу.
Яму спатрэбіцца падаць інфармацыю з падставамi для вываду з-пад санкцыяў (напрыклад, выкананьне Менскіх пагадненьняў) і пацьвердзіць, што гэта адбываецца ў інтарэсах ЗША.
У Кангрэсу ёсьць 30 дзён, каб зрэагаваць.
За што накладзеныя санкцыі
У дакумэнце згадваецца анэксія Крыму і ўдзел Расеі ў канфлікце на ўсходзе Украіны, перадача зброі Сырыі і «дзеяньні для падрыву кібэрбясьпекі».
Санкцыі накладаюцца за дзеяньні, зьвязаныя з:
- кібэрбясьпекай;
- нафтавымі праектамі;
- карупцыяй;
- парушэньнем правоў чалавека;
- спробамі пазьбегнуць санкцыяў;
- фінансавымі інстытутамі;
- узаемадзеяньнем з расейскай абароннай сфэрай альбо выведкай;
- экспартнымі трубаправодамі;
- прыватызацыяй дзяржаўных актываў чыноўнікамі;
- пастаўкамі зброі ў Сырыю.
На каго могуць накладацца санкцыі
Пад санкцыямі гэтым разам могуць аказацца кампаніі, зьвязаныя з расейскімі нафтаздабыўнымі праектамі, будаўніцтвам нафта- і газаправодаў, а таксама арганізацыі, якія ўзаемадзейнічаюць з сфэрай абароны Расіі, Галоўным выведным упраўленьнем і ФСБ.
Акрамя таго, пад санкцыі паводле новага закону могуць трапіць людзі, якія бралі ўдзел у «сур’ёзных парушэньнях правоў чалавека на любой тэрыторыі, сілком акупаванай або падкантрольнай ураду Расейскай Фэдэрацыі», а таксама людзі і арганізацыі, якія ўдзельнічалі ў нядобрасумленнай прыватызацыі і карупцыйных схемах.
У дачыненьні да Сырыі пад санкцыі трапляюць асобы, якія спрыяюць ўраду гэтай краіны ствараць або набываць хімічную, біялягічную або ядзерную зброю, альбо «дэстабілізуюць» аб’ёмы і колькасьць відаў звычайных узбраеньняў, балістычных або крылатых ракетаў.
У адпаведнасьці з патрабаваньнямі дакумэнту, санкцыяўныя сьпісы будзе фармаваць — як і раней — аддзел па кантролі замежных актываў (The Office of Foreign Assets Control), структура Мінфіну ЗША, якая адказвае за выкананьне заканадаўства ў галіне санкцыяў.
Што могуць ўключаць у сябе санкцыі
- адмову надаваць банкаўскія паслугі;
- адмову надаваць банкаўскія паслугі пры экспарце тавараў або паслугі для асобы пад санкцыямі;
- адмову ў экспарце тавараў і паслугаў асобе пад санкцыямі;
- адмову надаваць крэдыты на сумы звыш 10 мільёнаў даляраў (на год), акрамя выпадкаў, калі гэтыя грошы прызначаныя для «дзейнасьці дзеля палягчэньня пакутаў людзей»;
- выкарыстаньне права голасу ў міжнародных фінансавых арганізацыях для супрацьдзеяньня выдачы крэдытаў асобам пад санкцыямі;
- адмову ў закупцы тавараў або паслуг у людзей пад санкцыямі з боку ЗША;
- забарону выкупляць доўг або долю ў арганізацыях, якія трапілі пад санкцыі;
- адмову праводзіць апэрацыі зь нерухомасьцю;
- блякаваньне актываў;
- адмову ў візе альбо выдварэньне з тэрыторыі ЗША.
Выключэньні
Санкцыі не распаўсюджваюцца ў выпадках, калі гэта можа закрануць дзеяньні амэрыканскага касьмічнага агенцтва (NASA) а таксама касьмічныя запускі для амэрыканскіх кампаніяў, набыцьцё кампанэнтаў падраднікамі і субпадраднікамі Пэнтагону.
Гэта невыпадкова: «Роскосмос» і NASA шчыльна супрацоўнічаюць у касьмічнай сфэры вакол Міжнароднай касьмічнай станцыі, а, напрыклад, Афганістан выкарыстоўвае грошы ЗША для абслугоўваньня раней набытых у Расеі верталётаў Мі-17.
Як рэагуе Расія
Прэзыдэнт Расеі Ўладзімір Пуцін назваў прыняцьце новага пакету санкцыяў «хамствам» і заявіў, што «Расеі давядзецца адказваць».
Прэм’ер-міністар Дзьмітрый Мядзьведзеў напісаў, што «надзеі на паляпшэньне нашых адносінаў з новай амэрыканскай адміністрацыяй — канец».
У адказ на яшчэ не падпісаны пакет санкцыяў Крэмль ужо запатрабаваў ад ЗША скараціць колькасьць работнікаў амбасады і консульскіх службаў у Расеі на 755 чалавек і забараніў амэрыканскім дыпляматам карыстацца дачай у Сярэбраным Бары ў Маскве, а таксама складам у Чартанаве.
