Амбасадар ЗША ў ААН Нікі Хэйлі дала зразумець, што калі прэзыдэнту Дональду Трампу спатрэбіцца нанесьці новыя ваенныя ўдары ў Сырыі, ён на гэта пойдзе.
«Ён на гэтым ня спыніцца, — заявіла Хэйлі тэлеканалу CNN. — Калі спатрэбяцца дадатковыя дзеяньні, ён іх распачне».
Зьмена ўраду ў Сырыі выходзіць на першы плян сярод зьнешнепалітычных прыярытэтаў Злучаных Штатаў, заявіла пастаянны прадстаўнік ЗША пры ААН Нікі Хэйлі. У інтэрвію Сі-эн-эн яна зазначыла, што барацьба з «ісламскай дзяржавай» па-ранейшаму застаецца галоўнай задачай, але канфлікт у Сырыі нельга ўрэгуляваць, пакуль ва ўладзе застаецца Башар Асад, падкрэсьліла амэрыканскі дыплямат.
У ноч на 7 красавіка ЗША нанесьлі ўдар па авіябазе сырыйскіх урадавых сіл — у адказ на хімічную атаку ў правінцыі Ідліб, ахвярамі якой сталі дзясяткі мірных жыхароў.
Сёньня прэзыдэнты Расеі і Ірану Ўладзімір Пуцін і Хасан Рухані ў тэлефоннай размове раскрытыкавалі дзеяньні ЗША, назваўшы іх недапушчальнымі.
