Да 72 узрасла колькасьць ахвяраў меркаванай хімічнай атакі 4 красавіка ў сырыйскім горадзе Хан-Шайхун, які ўтрымліваюць узброеныя атрады апазыцыі. Паводле дадзеных «Сырыйскага цэнтру маніторынгу выкананьня правоў чалавека», палова загінулых — жанчыны і дзеці. Мясцовыя мэдыкі падазраюць, што быў ужыты нэрвова-паралітычны газ.
Расея, якая падтрымлівае рэжым Башара Асада, заявіла ў сераду, што 4 красавіка сырыйская авіяцыя нанесла ўдар па ўсходняй ускраіне гораду Хан-Шайхун, па складзе снарадаў з атрутнымі рэчывамі. Як заявіў прадстаўнік расейскага міністэрства абароны Ігар Канашэнкаў, названыя боепрыпасы вырабляліся «баевікамі-тэрарыстамі» і пастаўляліся ў Ірак і Сырыю.
Напярэдадні ЗША ўсклалі адказнасьць за хімічную атаку на рэжым Башара Асада.
Сёньня Рада Бясьпекі ААН разгледзіць падрыхтаваную заходнімі краінамі рэзалюцыю, якая асуджае ўжыцьцё небясьпечнай зброі ў Сырыі.
