Сямашка мяркуе, што Беларусь пачала выходзіць з рэцэсіі, а гэта значыць, што «самы складаны пэрыяд ў эканоміцы рэспублікі, мы перажылі»:
«Я абсалютна перакананы, што ў вельмі няпростых умовах, якія склаліся аб’ектыўна, незалежна магчыма ад нашай краіны, ад прадпрыемстваў, міністэрстваў і ведамстваў, але мы перажылі гэты пэрыяд — самы складаны, я лічу, у эканоміцы нашай рэспублікі».
У праграме Ўсебеларускага народнага сходу заплянавалі абмеркаваньне дакумэнту пра асноўныя кірункі сацыяльна-эканамічнага разьвіцьця Рэспублікі Беларусь да 2020 году.
«Што характэрна, у дакумэнце, які будзе абмяркоўвацца сёньня-заўтра, няма той дылемы, якая гучала паўгода-год таму, — апісвае дакумэнт віцэ-прэм’ер Сямашка. — Што вялікая прамысловасьць не ажыла, яе трэба сур’ёзна рэфармаваць, многія прадпрыемствы закрываць, перадаваць іншаму ва ўласнасьць, а нас выратуе малы і сярэдні бізнэс. Што мне падабаецца, у гэтым дакумэнце дакладна агаворана, што трэба займацца і тым, і другім».
Таксама віцэ-прэм’ер паведаміў, што будзе распрацаваны дакумэнт, які паставіць у роўныя ўмовы дзяржаўных і прыватных інвэстараў пры ацэнцы інвэстыцыйных праектаў:
«Будзе аднолькавае стаўленьне да дзяржаўных, прыватных прадпрыемстваў, малых, сярэдніх і так далей. Будзе ўкаранёная конкурсная сыстэма выбару інвэстыцыйных праектаў. Той праект, які найбольш эфэктыўны, мае мінімальныя тэрміны акупнасьці, таму будзе перавага».
Усебеларускі народны сход праходзіць у Менску 22-23 чэрвеня. У ім бяруць удзел дзьве з паловай тысячы дэлегатаў.
