Іран і шэсьць сусьветных дзяржаў дасягнулі гістарычнай ядзернай зьдзелкі, якая прадугледжвае адмену міжнародных санкцыяў у дачыненьні да Тэгерана ў абмен на абмежаваньне яго ядзернай праграмы.
«Уся цяжкая праца была недарэмнай», — прыводзіць агенцтва Reuters 14 ліпеня словы неназванага іранскага дыплямата.
Між тым, прэсавы сакратар Эўрапейскага Зьвязу паведаміла, што ў 10.30 па мясцовым часе ў Вене пачнецца сустрэча кіраўнікоў зьнешнепалітычных ведамстваў Вялікабрытаніі, Кітая, Францыі, Нямеччыны, Расеі і ЗША з міністрам замежных спраў Ірана. Па выніках гэтай сустрэчы бакі павінны паставіць подпісы пад дакумэнтам.
Перамовы ў аўстрыйскай сталіцы працягваліся больш за два тыдні.
Заходнія краіны вінавацілі Іран у спробах стварыць ядзерную зброю, Тэгеран адмаўляў такую мэту сваёй ядзернай праграмы. Супрацьстаяньне з гэтай нагоды працягвалася больш за 12 гадоў.
Пасьля вырашэньня гэтай спрэчкі, з Ірана будуць здымаць заходнія санкцыі, у тым ліку на міжнародны рынак патрапіць іранская нафта. Апошняе можа выклікаць падзеньне цэнаў на нафту.
