Пасьля сустрэчы з прэзыдэнтам Эстоніі Тоомасам Хендрыкам Ільвэсам прэзыдэнт ЗША Барак Абама заявіў аб разьмяшчэньні ваенна-паветраных сілаў ЗША ў Эстоніі, перадае Agence France-Presse. Удакладняецца, што амэрыканскія ВПС будуць дысьлякавацца на ваенна-марской базе Amari Air Base.
«Сёньня я магу аб’явіць, што гэтая ініцыятыва ўключае ў сябе разьмяшчэньне дадатковых частак ВПС, самалётаў для правядзеньня вучэньняў. Мы лічым, што лепшым месцам для іх разьмяшчэньня стане ваенна-марская база тут, у Эстоніі,» — заявіў прэзыдэнт ЗША.
Абама падтрымаў вызначэньне Эўразьвязам дзеяньняў Расеі ва Ўкраіне, як агрэсіі, ды запэўніў Эстонію ў падтрымцы Злучанымі Штатамі рэгіянальнай бясьпекі краінаў Балтыі і ў непарушнасьці амэрыканскага абавязацельства абараняць любога чальца НАТО ад нападу.
Інфармацыйны балтыйскі партал Дэльфі падае асноўныя тэзы выступу Барака Абамы на сумеснай прэсавай канфэрэнцыі з прэзыдэнтам Эстоніі.
- Тое, што адбываецца ва Ўкраіне -- трагічна, але гэта дае нам магчымасьць сьвежым поглядам паглядзець на нашы абавязацельствы перад НАТО.
- Наша задача ў тым, каб не было ніякіх розначытаньняў па 5 артыкуле статуту НАТО*.
- Санкцыі мелі адчувальны ўплыў на Расею.
- Украіна павінна адчуваць, што мы зь ёй ня толькі на словах, але і на справе.
- Занадта рана казаць аб тым, што менавіта будзе азначаць гэтае спыненьне агню, аб якім у сераду дамовіліся Парашэнка і Пуцін.
- Да гэтага часу асаблівых вынікаў ад заяваў пра спыненьне агню мы ня бачылі.
