Што для вас свабода?
На вялікі жаль – назва радыё.
Што найбольш абмяжоўвае вашу свабоду?
Ды асабліва нічога. Мужчына не павінен скардзіцца, мужчына павінен рабіць.
Што для вас шчасьце?
Штодня быць побач з каханай, адчуваць, што яна цябе разумее і падтрымлівае.
Чаго вы найбольш баіцеся?
Страціць шчасьце.
Які талент вы хацелі б мець?
Граць на музычных інструмэнтах і сьпяваць. Той выпадак, калі кажуць: «Ня ўмею, але дужа люблю». Мядзьведзі на вушах танга танчылі… Таксама заўжды хацеў умець маляваць – але малюю, як трохгадовае дзіця. А можа і горш.
Кім з сучасьнікаў вы захапляецеся?
Збольшага тымі людзьмі, зь якімі маю шчасьце быць знаёмы асабіста. Найперш Рыгорам Барадуліным – найвялікшым Паэтам і Беларусам сучаснасьці. Таксама захапляюся 93-гадовай Эльжбетай Радзівіл.
Калі падумаць яшчэ хвілінку – прыходзіць на розум шмат іншых імёнаў, напрыклад, Лявон Вольскі. Захапляючыся, стараюся максымальна вучыцца ў гэтых людзей.
Што вы найбольш любіце рабіць?
Справу.
Калі б можна было пражыць жыцьцё яшчэ раз, што б вы зьмянілі?
Хіба што надаў бы больш увагі адукацыі ў маладзейшым веку, вывучэньню моваў, музычнай школе. Як паказвае практыка, адгаворка «вазьмуся вучыць» патанае за працаю й штодзённымі справамі.
Якую найлепшую параду вы атрымалі?
Слухаць толькі тых людзей, якіх любіш і паважаеш.
Які ваш улюбёны дэвіз?
Ніколі назад – толькі наперад!
У якой палітычнай сыстэме вы хацелі б жыць?
Ня думаў пра гэта, слаба ў гэтым разьбіраюся.
У якой краіне вы хацелі б жыць?
У той, дзе й жыву.
У якую эпоху вы хацелі б жыць?
У XVII-XVIII стагодзьдзях. А калі ня жыць, то хаця б адным вокам зірнуць, як там.
Калі б вы сталі кіраўніком Беларусі, што б зрабілі найперш?
Пастараўся б захаваць станоўчыя здабыткі папярэднікаў і зрабіць максымальна, каб краіна ня рухнула ў пустку.
Якія адносіны Беларусь павінна мець з Эўразьвязам?
Добрасуседзкія, узаемавыгадныя.
Якія адносіны Беларусь павінна мець з Расеяй?
Добрасуседзкія, узаемавыгадныя.
Некаторыя думаюць так: “Хай дыктатура, абы свая”. А Вы?
Я так ня думаю.
Калі і як у Беларусі зьменіцца ўлада?
Нечакана. А калі – ніхто ня скажа.
Калі беларусы загавораць па-беларуску?
Усе – ніколі.
Што будзе, калі беларусы не загавораць па-беларуску?
Краіну – як і цяпер, як і 100 гадоў таму – будуць ратаваць усё тыя ж 300 спартанцаў нацыянальнай культуры.
