Прэм’ер-міністар Дональд Туск:
У той жа час Дональд Туск заявіў, сустракаючыся з журналістамі, што “рэпрэсіі супраць беларускіх палякаў абуральныя”.Ён падкрэсьліў, што адной з умоваў паляпшэньня стасункаў паміж Варшавай і Менскам павінна стаць і абыходжаньне з польскай меншасьцю ў Беларусі.
Як заявіў Туск, становішча польскай меншасьці ў Беларусі абумоўлена ня толькі адносінамі паміж Польшчай і Беларусьсю. “Дрэнную ролю” ў гэтай справе адыгрываюць і ўнутраныя адносіны ў Беларусі. “Гэтыя неабгрунтаваныя і скандальныя элемэнты рэпрэсіяў адносна польскай меншасьці… ня маюць пад сабой сур’ёзных падстаў, гэта вынік складанага палітычнага становішча ў Беларусі”, — лічыць польскі прэм’ер.
Паводле Туска, яму і Сікорскаму давялося прыняць “нялёгкае рашэньне”, каб, з аднаго боку, паспрыяць набліжэньню Беларусі да эўрапейскіх стандартаў і эўрапейскай палітыкі, а з другога -- актыўней “размарожваць” польска-беларускія адносіны, што дапаможа і беларускім палякам.
Ці азначае гэта, што Варшава чакае хуткага плёну?
Паводле польскага прэм’ера, “няўзброеным вокам відаць, што не”. Ён дадаў, што Польшча жадае ясна сказаць сваім беларускім партнэрам: каб быць бліжэй да Эўропы, трэба захоўваць пэўныя стандарты, у прыватнасьці наконт стаўленьня да польскай меншасьці. Калі ж беларускі бок ня зможа ці не захоча захоўваць гэтыя стандарты, “замарозка” ў адносінах будзе працягвацца.
У часе брыфінгу, які адбыўся пасьля падпісаньня Дамовы аб малым памежным руху, міністар замежных справаў Польшчы Радаслаў Сікорскі падкрэсьліў, што далейшае збліжэньне Беларусі з Эўразвязам залежыць ад таго, ці беларускія ўлады будуць шанаваць правы чалавека, у тым ліку і правы нацыянальных меншасьцяў.
“Наша палітыка залежыць ад таго, што зробіць сама Беларусь. Але я – аптыміст і заўсёды шукаю пазытыўныя сцэнары”, – сказаў Сікорскі.
Між тым кіраўнік МЗС Беларусі Сяргей Мартынаў, адказваючы на шматклікія пытаньні журналістаў пра перасьлед СПБ на чале з Анжалікай Борыс, заявіў, што беларускі ўрад “ня хоча ўмешвацца” ў справы палякаў і не парушае іхных правоў.
