Лукашэнка — у Сэрбіі, Адамкус — у Мэксыцы. Астатнія змагаюцца з крызісам

Сыны Лукашэнкі зь сем'ямі занялі цэлы паверх?

Прэзыдэнт Літвы Валдас Адамкус яшчэ ў сярэдзіне лютага адляцеў за акіян. Праўда, у літоўскага прэзыдэнта зімовы адпачынак — традыцыя, якую ён не парушае апошнія два дзясяткі гадоў. Аднак у бальшыні прэзыдэнцкіх канцылярыяў паведамілі, што ў крызіс кіраўнікам краінаў не выпадае думаць пра адпачынак.

Кіраўнікі суседніх зь Беларусьсю дзяржаваў пачатак вясны сустрэлі па-рознаму — хто замежным візытам, хто паездкай па праблемных прадпрыемствах.

Прэзыдэнт Расеі Дзьмітрый Мядзьведзеў сёньня пачаў афіцыйную паездку ў Гішпанію. З тэлевізійных справаздачаў відаць, што з трапу самалёта Мядзьведзеў спускаўся разам з жонкай, як абумоўлена пратаколам. Але бяз сына. На гэтым тле варта ўзгадаць, што летась на саміт кіраўнікоў СНД Аляксандар Лукашэнка прыляцеў у Бішкек з малым сынам Мікалаем. Відавочна, што ў Мадрыдзе для Мядзьведзевых арганізуюць культурную праграму, аднак гэта будзе толькі дадаткам да дзяржаўнага візыту.

У канцылярыі прэзыдэнта Латвіі паведамілі, што бліжэйшым часам Валдыс Затлерс ніякіх адпачынкаў і замежных візытаў не плянуе. У зьвязку з крызісам сытуацыя ў Латвіі — адна з найгоршых у Эўразьвязе, да таго ж ідзе фармаваньне новага ўраду. Пакідаць у такім становішчы краіну ніяк не выпадае:

“Усе адпачынкі прэзыдэнта плянуюцца загадзя, і няма такога, каб грамадзкасьць пра ад’езд кіраўніка краіны даведвалася пастфактум. Але нават пры складзеным графіку могуць быць карэктывы, бо ўсё залежыць ад таго, якая сытуацыя ў дзяржаве, ці можа дазволіць яму адпачываць сытуацыя, якая патрабуе ягонай абавязковай прысутнасьці ў Латвіі. Прынамсі, зараз ніякіх адпачынкаў прэзыдэнт не плянуе”.

А вось у апараце прэзыдэнта Літвы распавялі, што гэты тыдзень, як і два папярэднія, краіна жыве без свайго лідэра на працоўным месцы. Аднак палітычная і эканамічная сытуацыя — “пад поўным кантролем”. Гаворыць намесьніца дарадцы прэзыдэнта Ліна Гарбачовене:

“Кожны год ягоны адпачынак прыпадае на адзін і той жа час — на сярэдзіну лютага, пасьля дзяржаўнага сьвята. 16 лютага ў Літве адзначаецца Нацыянальны дзень незалежнасьці, і на наступны дзень, 17 лютага, ён на тры тыдні адлятае ў адпачынак. Цяпер ён у Мэксыцы. Такая ўжо склалася традыцыя — на адным і тым жа курорце ён адпачывае ўжо шмат гадоў, гадоў 20, калі ня болей. У гэты час і парлямэнт ня мае ніякіх асаблівых спраў, таму ён і выбраў гэты прамежак часу”.

Карэспандэнт: “То бок ніякіх карэктываў у зьвязку з сусьветным крызісам не рабілася?”

“Ведаеце, не. Асаблівых падставаў штосьці мяняць не было”.

Прэзыдэнт Украіны Віктар Юшчанка дазволіў сабе адпачыць у дзень нядаўняга 55-гадовага юбілею. Як паведамілі ў прэс-службе ўкраінскага лідэра, 23 лютага Юшчанка ўзяў адзін дзень у лік штогадовага адпачынку, каб адсьвяткаваць дзень нараджэньня ў сямейным коле. З жонкай, дзецьмі і найбліжэйшымі паплечнікамі ён гасьцяваў у дзяржаўнай рэзыдэнцыі “Сінягора” ў Карпатах, а ўжо 24 лютага прыступіў да працы ў Кіеве. Прынамсі, да лета ніякіх дадатковых вакацый у яго не заплянавана.

Кіраўнік Польшчы Лех Качынскі, як кажуць польскія калегі-журналісты, актыўна змагаецца з крызісам і пра пазачарговую рэляксацыю ня думае. Прэзыдэнт шмат езьдзіць па краіне, сустракаецца з экспэртамі, наведвае праблемныя прадпрыемствы.

Што да Аляксандра Лукашэнкі, то апошнім часам ён не прапускае магчымасьці наведаць які-небудзь гарналыжны курорт. Яшчэ ў “невыязныя” часы Лукашэнку з атачэньнем раз-пораз выяўлялі ў Аўстрыі і Славеніі. Днямі сьпіс папоўніла Сэрбія. Апроч таго, Лукашэнка актыўна асвойваў трасы ў расейскай Краснай Паляне і казахстанскім Чымбулаку. На загад Лукашэнкі ў Сілічах пад Менскам некалькі гадоў таму збудавалі штучную гарналыжную трасу, якую напярэдадні кожнага сэзону ён адкрывае асабіста.