Прэтэндэнт вінаваціў камэнданта магілёўскага інтэрнату № 6 акцыянэрнага аб’яднаньня “Магатэкс” у тым, што той перашкодзіў ягонай ініцыятыўнай групе зьбіраць подпісы ў яго падтрымку. Пракуратура й камісія фактаў парушэньня ня выявіла. Так пазначана ў адказе старшыні донарскай няўрадавай арганізацыі “Кропля жыцьця” Ігару Каваленку.
Непасрэднай сьведкай факту парушэньня выбарчага заканадаўства была сябра ініцыятыўнай групы апазыцыянэра Аксана Самойлава. Яна ўпершыню ўдзельнічае ў выбарчай кампаніі, і ўпершыню ёй давялося даваць тлумачэньні ў пракуратуры. Паводле спадарыні Самойлавай, пракурор у гутарцы зь ёй паводзіла сябе надзвычай дзіўна:
“Самае абуральнае, што ў мяне выклікала буру эмоцыяў, гэта тое, што я прыйшла зь дзяўчынай, якая не ў ініцыятыўнай групе, але яна хадзіла са мной. Гэтую дзяўчыну пракурор сама непасрэдна выклікала, а потым ёй сказала: “А вы не з ініцыятыўнай групы, дык хто вы такая? Пайшла з кабінэту!” І тут жа ў мяне пытаецца: “Ці ёсьць сьведкі?”
Рашэньне пракурора ня стала для Аксаны Самойлавай нечаканым. Што найбольш уразіла спадарыню Самойлаву падчас збору подпісаў:
“Уразілі адносіны людзей, якія маюць хоць нейкую ўладу, да выбараў. Ім сказалі: прапускаць таго, а таго не прапускаць — яны так і робяць. Без згрызотаў сумленьня яны могуць хлусіць у пракуратуры. Таму ясна, што выбары не дэмакратычныя. Я думала, што так будзе, аднак ня думала, што гэта будзе так яскрава відаць”, — зазначае Аксана Самойлава.
30 ліпеня вахторка інтэрнату не дазволіла прайсьці ініцыятыўнай групе апазыцыйнага прэтэндэнта да яго насельнікаў, каб зьбіраць подпісы. Вахторка тлумачыла свае дзеяньні загадам камэнданткі, якая нібыта загадала прапускаць у інтэрнат толькі ініцыятыўную групу старшыні абласнога грамадзкага аб’яднаньня “Беларускі саюз вэтэранаў вайны ў Аўганістане” Ўладзімера Васіленкі. У пракуратуры вахторка казала адваротнае: маўляў, ніхто не загадваў.
